كل واحد يعتمد على نفسه

Wednesday, August 10, 2005

أحنا أيه


بنجرح و نعض فبعض كل واحد مداري لقمته من أخوه خايف ليخطفها منه بنجري فلدنيا دي علشان نصطاد أي فرصه تقوينا مش مهم بندوس على ايه ولا على مين زميلك ماشي صاحبك ماشي عليتك ,اخوك,امك,ابوك كله مش مهم,حياتنا بقت صراع دائم العلاقات الأنسانيه بقت مشوهه بقينا حيوانات بمعنى الكلمه بقت الشهوه في اوقات كتير هى اللي بتحكمنا,و زي ما الحيوانات عمرها مبتنام مطمنه احنا بدأنا نبقى كده,كل يوم بنقرى عن الأخوات اللي بيتخنقو مع بعض على الورث و بدل ما يورثو بيتورثو,و الأصحاب اللي بيتخنقو مع بعض على بنت و بدل ما يتجوزو بيتجنزو.و لا اللي زاد الأب اللي بيغتصب بناته و الأخ اللي بيبيع أخته,و الخاله اللي بتاجر فبنت أختها,اعتقد انه حتى الحيوانات عندهم أخلاق اكتر حروبهم دايما" لسبب جوهري و دايما" شريفه يعني عمرنا مسمعنا عن بقره ضللت بقره علشان تاخد مكانها في القطيع,حروبهم مفيهاش لضرب تحت الحزام و لا غدر في الضهر يعني محصلناش حيوانات نبقى أيه؟؟؟
القوه عندنا بقت هى العدل و الحق,بقت لغتنا و منطقنا ممكن تبقى فلوس ممكن تبقى منصب مش مهم,

Sunday, July 24, 2005

بيتغذو بدم الميتين بيكبرو على جثث المقتولين,ميعرفوش غيرها مش قارفانين منها,بيطلع كبيرهم يقولهم انها هديه من ربهم هم بس اللي يستحقوها,شويه و كمياء جسمهم بتتغير ما بيستحلوش غيرها و خلاص مدام متاحه بأمر كبيرهم أبو مساحه يبقى أيه يمنعهم كلنا بلنسبه لهم أموات بس الطريقه

Thursday, July 21, 2005

القمر كان مفزوع!!! وقلقان


حاجه غريبه جدا" كل يوم كنت بشوف القمر جميل و منور و عمال يتفرج على البشر و يراقبهم كده من غير كلام,أمبارح بس حاسيت أنه مفزوع و حزين أو جايز مندهش أنا مش عارفه بس حاولت أفكر في اللي ممكن يكون شافه و ثبته فمكانه كده بكل الهلع اللي باين عليه ده,أول فكره جات على بالي أنه يكون شاف مجموعة العيال أياها اللي بتنام في الشارع و عاملين مجتمع لوحدهم لاغين مرحله كامله من حياتهم مفطومين عن كل حاجه بدري بدري سجاير,غرا و كله بيشموا اليل و يداروخو في النهار و مع أنهم معندهمش حاجه خالص بيدوا بعض كل حاجه الشعور بلأمان اللي معرفهوش في بيوتهم أو في المؤسسات اللي بعضهم كان فيها و الغريب أنهم ما عندهمش أي سبب مبرر للأمان ده,نايمين في الشارع لا سقف و لا غطى بيغطو بعض,الناس كلها خايفه منهم مع أن صبغه الشارع لو اتمسحت من عليهم حنلاقي أطفال,من غير برأه و بجمود بس هو أيه زنبهم؟
جايز يكون شاف زينب اللي عمرها ميجيش ستاشر سنه و هي جنب راجل يجي عمره خمسه و سبعين سنه و الناس بترقص و تغني و فرحانين و لا كأنها ليله العيد الكبير.... و زينب كل اللي باين عليها هو الهلع
جايز يكون شايف الحفلات اللي بيتباع فيها البشر من غير ثمن,أو جايز شايف الشباب السهرانين على القهاوي للفجر و بيسأل نفسه مين اللي نايم علشان يصحى لشغله بدري,أو جايزيكون حايران و مكتئب من المشاكل و الشكاوي اللي بتوصله من المواطنين الصالحين كل يوم و هم عارفين أنه الوحيد اللي حايسمع شكوتهم ألف حاجه تانيه...و مليون سبب و سبب للي تخليه بشكل ده و للتخليه ما بيطلش خالص, بس أنا مش عارفه ,هو قمرنا بس اللي كده,ويترى حيستحملنا لحد امتى قبل ما يستقيل من شغلته و يبطل يبقى قمر و يتحول لمرايه نفوسنا الحيرانه,الحزينه المليانه دهشه و هلع

Monday, July 18, 2005

متقولش أيه أدتنا مصر؟؟؟؟

هي دي المشكله,هو وجع القلب اللي احنا فيه ده ليه غير علشان مصر اللي كانت من أحلى بلاد الدنيا قبل ما جماعة ثارت على النظام الطبقي و سمعة مصر اللي ضيعها فلان بعميله,الكل هلل و فرح بس بقى الكل بيقطع فيك يا مصر و يشتم فيك ,علمو عيالك ميتكلموش علموهم الجبن ,الألقاب اللي الكل هلل لما اتلغت كلنا عارفين هى بتتقال لمين دلوقتي,هم ثاروا في الفترة دي يعني كان من حقهم يفكروا ؟هل ده من حقنا؟أنا مش قصدي أنه كان نظام كويس بس اهه كان نظام و السلام ليه عيوبه و مميزاته,كل اللي أنا عارفاه اننا وقتها هللنا زي ما كتير ما بيهللوا دلوقتي قالوا اننا كنا فمرحله انتقاليه و البلد كان لازم تتحكم بأيد من حديد ما شي كل ده انتقال,مع انه ناس كتير عددت بسرعه أقوي و بقت من اصحاب الألقاب اللي ورثته لأولدها اللي بقوا فوق القانون بقوا الهه في الأرض لما تكلم حد منهم يقولك انت عارف انت بتكلم مين؟؟يبقى ايه الفكره من الحركه اللي اتعملت دي؟و اللي لازم احنا ندفع تمنها و نقول حاضر,أنا عارفه أني مش عارفه أوصل فكرتي بس أهه كلام,و الحل من عندك يا رب
أنا حقيقي أسفه يا مصر أني مش عارفه أعملك حاجة و معنديش غير حارقة دمي اقدمهالك اللي لا حتودي و لا تجيب

Tuesday, July 12, 2005

"All your life you are told the things you cannot do. All your life they will say you're not good enough or strong enough or talented enough; they will say you're the wrong height or the wrong weight or the wrong type to play this or be this or achieve this. THEY WILL TELL YOU NO, a thousand times no, until all the no's become meaningless. All your life they will tell you no, quite firmly and very quickly.AND YOU WILL TELL THEM YES."

, Nike ad

الأصلاح الشامل......طب ازاي ؟؟؟؟
ده كل حاجة عاوزه تصليح و في حاجات عاوزة تتهد و تتعمل من الأول لأن التصليح حيشوهها زيادة مش بس نظام الحكم (الغير مفهوم)هو اللي لازم يتغير ...........الشعب لازم يتغير
احنا شعب ناره انطفت من كتر النفخ,كنا بلد زراعي مناخه حار جاف صيفا" بارد معتدل شتا" دلوقتي احنا بلد مستورد جاف طول العام,لا يعرف معنى الأعتدال يسكنه شعب فقران و قرفان راضي بقليله مستني اللي يخليه يقضي حياته مش يعيشها,و هو مقضيها بشكل مبتكر و محدش سبقنا ليه مستغني عن كل أساسيات الحياه وعايش برغيف العيش اللي كل اللي بيعمله أنه يفكرك برغيف العيش الحقيقي
و مع كده شعبنا عايش من غير ما حد يطمنه أن بكره أحسن,و مش طالب من حد يقوله أن بكره حيكون أحسن,عايش و خلاص ر اضي برغيفه و قانع الحمد و الشكر ليك يا رب بس طموحنا لا زم يبقى أكبر من رغيف العيش من هنا رأي يبداء الأصلاح من تحت السلم و من الخرابات ومن حتت كتير معرفهاش بس موجوده ساكن فيها ناس لا زم يشتركو فصنع القرار و الا فلفرارالى عالم الحلم و الخيال

"سلم التطور"
في البدء,كنا سردين في البحور
لقيناها بايخه ف حقنا
صرنا سحالي,بجناحات زي الطيور
دايرين نلقط رزقنا
طحلب و دود
ودود و طحلب,كل يوم ف بقنا شئ مش تمام
طب نبقى ايه؟.... قالك:قرود
اصبحنا يا مبارك قرود
برضك زهقنا,و قلنا:لأ ,نبقى بشر
و بشر بقينا,و ايه بأه
اهو ليل نهار غلب و شقا
اين المفر؟
انا عندي حل معتبر
نبقى غجر
(صلاح جاهين)